Билии күнэ
БИЛИИ КҮНҮГЭР 1 КЫЛААС УЧУУТАЛА ҮӨРЭНЭЭЧЧИЛЭРИГЭР
Анастасия Егорова
Күндү оҕолор!
Бүгүн эһиэхэ, оҕолоор,
Долгутуулаах күн үүннэ,
Билии аанын арыйар
Кэтэһиилээх кэм кэллэ.
Үөрэх-үлэ үктэллэрэ
Эһигини күүтэллэр,
Ыраах-ыраас үрдэллэргэ
Угуйаллар, сирдииллэр.
Бу чыпчаалы дабайарга
Көмөлөһүөм, кынаттыам,
Үчүгэйгэ талаһарга
Күнүн аайы үөрэтиэм.
Бары манна үтүө доҕор,
Ааттаах атас буолуоххут,
Билии сырдык кыымын тутан
Ааҕар-суоттуур буолуоххут.
Сиэттиһэммит бука бары
Сайдыы суолун тутуһуохпут,
Үөрэх суолун батыһаммыт
Үтүө күҥҥэ дьулуһуохпут.
Билии-көрүү ыллыгар үктэммиккитинэн, оҕолоор.
*********
ҮӨРЭНЭЭЧЧИЛЭР ААҔАЛЛАРЫГАР ХОҺООННОР
Анастасия Егорова
1
Бүгүн манна, Хампаҕа
Билии күнэ, үөрүү күнэ,
Баҕа санаа этиллэр,
Ырыа-хоһоон иһиллэр.
Бүгүн манна, Хампаҕа
Билии күнэ, үөрүү күнэ,
Үөрэх сыла арыллар,
Үтүө сана айыллар.
2
Бүгүн үөрүүлээх күммүт-
Үөрэнээччи буолабыт,
Саҥа рюкзак сүгэммит
Оскуолаҕа киирэбит.
3
Дорообо, оскуола,
Үөрэнэр кыһабыт!
Үрдүүккэ кынаттыыр
Иитиэхтиир уйабыт!
4
Дорообо, учуутал,
Үөрэтэр ийэбит,
Билиини иҥэрэр
Бүөбэйдиир киһибит.
5
Бастакы чуорааммыт,
Чугдаарыый, чугдаарыый!
Киэҥ, сырдык кылааска
Үөрэнэ ыҥырыый!
6
Оскуолаҕа киирэрбин
Олуһун да күүппүтүм,
Долгуйаммын, үөрэммин
Бүгүн эрдэ турбутум.
7
Киэҥ-куоҥ уулуссанан
Киэн тута хааман кэллим,
Көрүҥ, көрүҥ, бүгүҥ мин
Оскуола аанын арыйдым.
8
Аара оонньоон кэлиэхпин
Саҥа көстүүм кэппиппин,
Мэниктээммин сүүрүөхпүн
Рюкзак сүкпүт эбиппин.
9
Ийэккээм миэхэҕэ
Сибэкки биэрбитэ,
Үөрэнэр кыһаҕар
Бэлэхтээр диэбитэ.
10
Дорообо, дорообо
Оскуола, оҕолор!
Бастакы кылааһым-
Үөрэнэр доҕоттор.
11
Миигин аны кыра диэмэҥ,
Үөрэнээччи буоллум мин.
Мэник-тэник оҕо диэмэҥ.
Оскуолаҕа киирдим мин.
12
Буукубаны, ахсааны
Кыһаламмын үөрэтиэм,
Ааҕан, суоттаан, суруйан
Дьоннорбун олус үөрдүөм.
13
Умнубакка, уһаппакка
Уруоктарбын аахтыаҕым,
Учууталбар эппиэттээн
Биэс сыананы ылыаҕым.
14
Сабыыс-саҥа суумкабар
Ыраас тэтэрээт угуннум,
Уруһуйдаах пеналбар
Харандааспын ууруннум.
15
Сылы быһа малбын мин
Харыстааммын туттуоҕум,
Кинигэбин, тэтэрээппин
Ып-ыраастык тутуоҕум.
16
Мин аны
Отой-отой
Мэниктээбэппин,
Оскуолаҕа
Остуол тула
Эккирээбэппин,
Олус-олус
Кыһалламмын
Үөрэниэхтээхпин,
Үчүгэй да
Үөрэнээччи
Дэттэриэхтээхпин.
17
Күһүн өлгөм үүнүүнү
Күлэ-үөрэ бэлэхтиир,
Көмүс кэрэ көстүүнү
Күн сиригэр ыспахтыыр.
Күһүн курдук дэлэгэй
Элбэх сыана ылыаҕым
Дьоммун олус үөрдээри
Туйгун сыана таһыаҕым.
18
Доҕотторбун кытары
Долгуйабын, үөрэбин,
Билии-көрүү ылаары
Оскуолаҕа киирэбин.
19
Үөрэнэммит биһиги
Туһа дьоно буолуохпут,
Дойдубутун ааттатар
Дьоһун дьоннор дэтиэхрит.
20
Бука бары бу манна
Үөрэ-көтө үөрэниэхпит,
Бука бары бу манна
Оскуоланы бүтэриэкпит.
21
Куруук бииргэ бу курдук
Олох устун хаамсыахпыт,
Өйөһөммүт, өйдөһөммүт
Бары бииргэ сылдьыахпыт.