Неймохов Егор Петрович
(1950 — 2011)
Саха Республикатын народнай суруйааччыта Егор Петрович Неймохов 1950 с. кулун тутар 30 күнүгэр Томпо улууһугар төрөөбүтэ.
1973 сыллаахха Саха государственнай университет историко-филологическай факультетын бүтэрэн, «Эдэр коммунист» хаһыат корреспонденынан, Тыл, литература уонна история институтун лаборанынан, «Хотугу сулус» сурунаал салаатын сэбиэдиссэйинэн, кылаабынанй редактор солбуйааччытынан, ССКП ОК культура салаатын инструкторынан, «Аргыс» уонна «Айсберг» сурунааллар кылаабынай редакторынан, СГУ доценынан, СР Президенин иһинэн государственнай наҕараадалар комиссияларын эппиэттиир секретардарынан, «Саха сирэ» хаһыат сурукка салаатыгар, Санкт-Петербурга Саха представительствотыгар, СР Суруйааччыларын союһун председателинэн үлэлээбитэ.
1975 с. бэчээттэнэр. Бастакы кинигэтэ (Д. Эверстовтыын суруллубут) «Тустууга анаммыт олох» 1980 с. тахсыбыта. Бастаан аатырбыт сэһэнэ «»Хапсыһыы (1983). Ол кэнниттэн утуу- субуу сэһэннэр, кэпсээннэр, романнар кинигэлэрин таһаартарар.
Сэһэннэринэн инсценировкалар сурулланнар, Саха театрыгар турбуттара. Уус-уран киинэ сайдыытыгар үтүөлээх. Кини сценарийынан «Хара маска», «Ильмень үрдүнэн туруйалар» киинэлэр уһуллубуттара.
Кэлин сылларга С. Михалков, Алампа тустарынан бөдөҥ романнары таһаартарбыта.
Саха сириттэн тахсыбыт Ю. Сергеев диэн суруйааччы «Ыраахтааҕылыы бултааһын» кинигэтин тылбаастаабыта.
Е.П. Неймохов Саха комсомолун, П.А. Ойуунускай аатынан Государственнай бириэмийэлэрин лауреаттара, СР культуратын үтүөлээх үлэһитэ этэ.
1991 с. — Саха Өрөспүүбүлүкэтин суруйааччыларын Сойууһун чилиэнэ.
2011 с. бэс ыйын 26 күнүгэр өлбүтэ. Томпоҕо көмүллүбүтэ.
«Сэргэлээххэ саас этэ» диэн маҥнайгы кэпсээнэ « Эдэр коммунист» хаһыакка бэчээттэммитэ. Автор айымньыларыгар бэйэтин кэмин дьонун- спортсменнары, искусство эйгэтин дьонун, ис орган үлэһиттэрин, учуонайдар, тыа сирин олохтоохторун үлэлэрин-хамнастарын туһунан ойуулаан көрдөрөр. Юрий Сергеев «Королевская охота» кинигэтин сахалыы тылбаастаабыта, Павел Пинигин «Путь к Олимпу» кинигэтин бэлэмнээбитэ. «Хапсыһыы» сэһэнэ П.А Ойуунускай аатынан драматическай театр сыанатыгар туруоруллубута.
Киинэ сценарийдарын суруйталаабыта. «Алампа» диэн икки чаастан турар романа киэҥ биһирэбили ылбыта.
НА5АРААДАЛАРА, ЫТЫК ААТТАРА
- Саха норуодунай суруйааччыта
- Саха комсомолун бириэмийэтин лауреата
- П. А. Ойуунускай аатынан государственнай бириэмийэ лауреата
- Саха Өрөспүүбүлүкэтин культуратын үтүөлээх үлэһитэ
- Томпо улууһун ытык киһитэ
Аатын үйэтитии
М. К. Аммосов аатынан Хотугулуу-Илин федеральнай университет Учуонай сүбэтэ тыл уонна омуктар культураларын Институтун бастыҥ студеннарыгар анаан Е. П. Неймохов анал ааттаах стипендиятын олохтообут.
АЙЫМНЬЫЛАРА САХАЛЫЫ ТЫЛЫНАН
Хапсыһыы. Сэһэн.-Дьокуускай, 1983.
Көтүү: Сэһэн.-Дьокуускай, 1986.
Хаһыы. Сэһэн.-Дьокуускай, 1988.
Татал түөрт кэмэ: Кэпсээннэр, ублицистика.-Дьокуускай, 2000.
Быһах биитинэн. Роман.-Дьокуускай, 2005.
Алампа: Роман. Бастакы кинигэтэ.-Дьокуускай, 2006.
Алампа: Роман. Иккис кинигэтэ.-Дьокуускай, 2009.
АЙЫМНЬЫЛАРА НУЧЧАЛЫЫ ТЫЛЫНАН
Спроси себя: Повесть /Пер. Ю. Сергеев.-М.: Мол. гвардия, 1987.
Дороги Якутии. В соавторстве с В. Федоровым.-Якутск, 2003.