КИИРИИ ТЫЛ
Сэтинньи 11 күнүгэр биллиилээх Саха сирин общественнай деятеля, саха литературатын төрүттээччи, учуонай Платон Алексеевич Ойуунускай төрөөбүтэ 130 сылын туолар. Суруйааччы үбүлүөйүгэр анаан оскуолабытыгар араас тэрээһиннэр ыытылла тураллар. Өктөм орто оскуолатын библиотеката бу өрөгөйдөөх үбүлүөйгэ анаан Платон Алексеевич Ойуунускай туһунан элбэх материаллары библиотека фондуттан хомуйан учууталларга, библиотекарьдарга көмө методико-библиографическай пособие оҥорон таһаарда.
Сыала: саха литературатыгар сүҥкэн кылааты киллэрсибит П.А. Ойуунскай аатын үйэтитии, айар үлэтин, айымньыларын дириҥэтэн үөрэтэр, сырдатар матырыйааллары хомуйан кэнэҕэски ыччакка тиэрдии, киэҥ араҥаҕа таһаарыы.
Пособие киэҥ араҥа дьонугар ананар. Ордук туһалаах буолуо учууталларга, ол курдук уруогун ыытарыгар элбэх материалы мантан булуон сөп, литературнай биэчэр тэрийэргэ сценарий суруйарга, оҕону чинчийэр үлэҕэ уһуйан, оҕо билиитин хаҥатарыгар күүс-көмө буолуо. Библиотекарьга пособие кинигэ выставкатын оҥороругар, бэлэм цитаталары туһаныан сөп, библиотечнай уруок, викторина ыытарыгар төһүү -күүс буолуо.
Пособие алта чаастан турар. Манна киирбит кинигэлэр бэчээттэммит сылларынан наардаанан киирдилэр.
Бастакы чааһа суруйааччы биографиятыттан саҕаланар. Иккис чааһыттан оскуола фондатыгар П.А. Ойуунускай ханнык айымньылара баарын сырдатар. Үһүс чааска научнай үлэтин туһунан справочнай материал киирдэ. Төрдүс чааска олоҕун, айар үлэтин сиһилии кэпсиир материаллар киирдилэр.
Бу пособиеҕа Ойуунускай сорох үлэлэрин сырдатар справочнай даннайдар киирдилэр, оскуола программатынан барар айымньыларыгар комментарийдар, П.А. Ойуунускай айымньыларыгар критическай ыстатыйалар оҕо өйтөн суруйарыгар көмө буолуон сөп.
Сыһыарыытыгар П.А. Ойуунускайга аналлаах кинигэ выстапкалара, цитаталар, П.А. Ойуунускай олоҕун, айар үлэтин арыйар викторина киирдэ.
Галина Максимовна Гаврильева
