(Саха остуоруйата)
— Туох хара накааһай доҕоор!… Абырҕаллыын, чычып-чааптыын, оннооҕор кутуйахтыын миигин куттууллар. Мин куттамматым бу аан дойдуга туох баарый? Туох да суох! Бары куттууллар! Суох, суох бу кэриэтин өлбүт ордук! Бараммын сүргэ балай уубар түһэн өлүөм! Тыыннаах да буолан диэн, — дии-дии, Куобах күөл диэки ойуолаан испитэ. Арай, күөлгэ чугаһаан иһэн иһиттэҕинэ, эриэн түөстээх Баҕа, күөлүн диэки ойуолуу-ойуолуу, хаһыытаан эрэрин истибит.
— Оо, айабыын! Куобах баҕайы сиэри иһэр. Уубар түһэ охсуум! Куттаннахпын да, куттаннахпыан!-Баҕа ууга «чолк» гынан хаалбыт.
Куобах хорос гына олоро түспүт.
— Көр эрэ, аан дойдуга мин да биир куттуурдаах эбиппин ээ! Кэбис, өлүөм суох! Төннүөххэ, — диэт, Куобах тыа диэки ойуолуу турбут.
// Кэскил: Сборник для детей дошкольного возраста /Составители: А.А. Егорова, М.П. Захарова.-2-е изд., дополненное, переработанное.-Дьокуускай:Бичик, 2002.-С.4