УЛААППЫППЫН
Н. Якутскай
“Сеня улаатта, үһүн туолла”,-диир ийэм. Сеня диэн ити аатым. Ийэм миигин күннэтэ таҥыннарар, сууннарар, аһатар, мэлдьи бииргэ сылдьар. Атаҕым сылайдаҕына, көтөҕөр.
Ийэбин олус таптыыбын. Ийэм олус үчүгэй!
Аҕам күннэтэ аайы үлэлии барар. Кини киэһэ кэлэр, өрөбүл эрэ күн миигин кытта оонньуур. Арыт кинигэ ааҕар, арыт куоракка күүлэйдии барабыт.
Биир өрөбүл күн аҕабар ийэм эттэ:
-Сеня улаатта. Оҕо садыгар киллэриэх. Оччоҕо үлэбэр төннүөх этим.
Мин дьиэбиттэн ханна да барыахпын баҕарбаппын. Ытаары гынабын. Аҕабар сөрүөстэбин.
Аҕам көтөҕөр, төбөбүн имэрийэр, мичээрдиир.
-Оҕом улаатта. Сотору оскуолаҕа киириэхпит!
Аҕабынаан оскуолаҕа киирэрбиттэн олус үөрэбин. Аҕабын кытта бииргэ сылдьан туохтан да куттаммаппын. Аҕам күүстээх, барыны-барытын сатыыр. Кумааҕынан самолёт оҥорон көтүтэр. Кубиктарынан тугу баҕарар тутар.
Аҕыйах хонон баран аҕам ийэбэр кумааҕы аҕалан биэдэ уонна:
-Сеняны сарсын луохтуурга илдьэн көрдөр,-диэтэ.
Луохтууртан олус куттанабын. Биирдэ күөмэйим ыалдьыбытыгар луохтуур кэлэн, ньуосканан айахпын хаспыта уонна эмп биэрбитэ.
-Сеня, садка киирэр сурук биэрбиттэр”-дии-дии, ийэм олус үөрэр. Миигин көтөҕөн ылан, тула холоруктуур.
Мин садка киириэхпин букатын баҕарбаппын. Ытаары гынабын.
-Улахан киһи ытаабат баҕайыта!-дии-дии, аҕам миигин ылар.
-Садка элбэх-элбэх оҕо баар. Оонньуурдара элбэх да элбэх.
Элбэх оҕону кытта оонньуурбун олус таптыыбын. Оҕо садыгар киллэрэр буолбуттарын сөбүлүүбүн.
//Кэскил.-С.33