АВТОРСКИЙ СЕМИНАР ГАВРИЛЬЕВОЙ Г.М. «Библиотечное краеведение как средство патриотического воспитания учащихся в современных условиях»
Олунньу 26 күнүгэр Панкратий Иванович Шадрин аатынан Өктөм орто оскуолатыгар оскуола библиотекара Галина Максимовна Гаврильева республика оскуолатын библиотекардарыгар «Библиотечное краеведение как средство патриотического воспитания учащихся в современных условиях» авторскай семинаарын ыытта. Барыта 9 улуустан, куорат уонна куорат таһынааҕы оскуолалартан 60 библиотекарь кыттыыны ылла. Семинар үрдүк таһымнаахтык ааста диэн кэлбит ыалдьыттар бэлиэтээтилэр.
Кэлбит ыалдьыттарга оскуола устун экскурсия тэрийэн, оскуола историятын кэпсээтилэр, музейын көрдүлэр. Ыалдьыттарга анаан: нэһилиэк историятын кэпсиир кинигэлэр, сэриигэ барбыт, тыылга үлэлээбит биир дойдулаахтарбыт туһунан кинигэлэр, Галина Максимовна өр сылларга нэһилиэк историятын, буойун учууталлар олохторун, олоҥхо тематын, төрүччүлэрин чинчийбит үлэлэрэ, оҕуруоннан араас оҥоһуктарын, оҕолор араас темаларга чинчийбит үлэлэрин араас быыстапкалара тэриллибиттэрэ.
Семинаар үөрүүлээх арыллыытын оскуола директора Российскай Федерация үөрэҕириитин бочуоттаах үлэһитэ Калиста Федосьевна Афанасьева саҕалаата. Хаҥалас улууһун библиотекардарын методииһа Виктория Афанасьевна Васильева, нэһилиэк библиотекара Мотрёна Егоровна Павлова, Өктөм оскуолатын саха тылын учуутала Светлана Алексеевна Яковлева тыл эттилэр. Өктөм оскуолатын библиотекатын үлэтин туһунан видеосюжет көрдүлэр.
Семинаары автор Галина Максимовна Гаврильева бэйэтэ иилээн-саҕалаан ыытта. Кини өр сылларга нэһилиэк библиотекара Мотрёна Егоровна Павловалыын кыраайы үөрэтиигэ бииргэ үлэлээбиттэрин кэпсээтэ.Ол түмүгэр, Өктөм нэһилиэгин историятын туһунан хас да кинигэ бэчээттэнэн тахсыбытын эттэ. Краеведение үлэтэ кэлэр кэнчээри ыччаты, оҕону иитиигэ улахан суолталааҕын тоһоҕолоон бэлиэтээтэ.
Семинар иккис аҥаарыгар Галина Максимовна оҕолору чинчийэр үлэҕэ дьарыгын кэпсээтэ. Ол курдук 7а кылаас үөрэнээччитэ Саша Максимова бэйэтин төрүччүтүн туһунан, 9 а кылаас үорэнээччитэ Сардаана Гоголева түөрт уолун сэриигэ атаарбыт хоодуот ийэ Мария Ивановна Шевелёва туһунан кэпсээн дьон сэҥээриитин ыллылар.
Семинар кыттылаахтарыгар Галина Максимовна баай уопутун үллэһиннэ, саха суруйааччыларын, улуус биллиилээх дьоннорун тустарынан библиографическай-методическай пособиелары сериянан таһааран сыл аайы фондатын хаҥатарын көрдөрдө. Бу оҥорор пособиелара биир киһи туһунан сүрдээх элбэх материалы киллэрбит, ол курдук пособиеҕа сырдатыллар киһи олоҕун кэрчигин хаартыскаларынан биографията, айымньылара, үлэлэрэ, айар үлэлэрэ, киниэхэ анаммыт хоһооннор, ыстатыйалар, бэлэм литературнай биэчэр сценарийдара, оҕолорго аналлаах викториналар, бэлэм кинигэ быыстапкаларын аата, киһи туһунан цитаталар, кини айымныьытынан киинэ, олоҕун, айар үлэтин кэпсиир видеосюжет, аудиокинигэ истиэхтэрин-көрүөхтэрин син. Маны таһынан аныгы онлайн сервистары туһанан оҕоҕо кинигэҕэ интэриэһиргэтэр туһуттан виртуальнай кинигэ быыстапкаларын, буктрейлердары, араас литературнай оонььуулары оҥорбутун көрдөрдө.
Улахан болҕомтону Галина Максимовна оҥорбут сайта тарта. Сайтыгар детсад, оскуола үөрэнээччилэригэр, төрөппүккэ, воспитательга, учууталга үөрэххэ, иитэр үлэҕэ аналлаах элбэх материаллааҕа сөхтөрдө. Оҕону кыра сааһыттан кинигэҕэ угуйар туһуттан детсад, оскуола программатынан сахалыы, нууччалыы кинигэлэри ааҕалларыгар анаан электроннай библиотека оҥорбут. Оҕо сааһынан көрөн онно киирэн хаһан баҕар, сөбүлээбит кинигэтин ааҕыан сөп, ону таһынан икки тылынан аудиокинигэлэри истиэн, мультфильмнары, саха классиктарын киинэлэрин дьиэ кэргэттэринэн көрүөхтэрин сөп эбит. Сайтыгар краеведенияҕа араас темаҕа баай материала ыалдьыттар болҕомтолорун тарта, ол курдук Өктөм нэһилиэгин историята, сэрии, тыыл бэтэрээннэрин испииһэктэрэ, хаартыскалара, ахтыылара; Буойун учууталлар, тыылга үлэлээбит оскуола оҕолорун ахтыылара; Буойун саха суруйааччылара; Оскуола историята (учууталларын, выпускниктарын туһунан матырыйааллар), нэһилиэкпит герой ийэлэрэ, саха буойун суруйааччылар, олоҥхоһут суруйааччылар, араас темаҕа аналлаах хоһооннор, таабырыннар, өс хоһооннор онтон да атын . Маны таһынан сайт оҥоруон баҕалаах дьоҥҥо туһалаах сүбэлэри биэрдэ.
Бүтэһигэр Галина Максимовна семинар кыттыылаахтарыгар Милена Ивановналыын музыкальнай нүөмэринэн түмүктээтэ, ырыа кэмигэр оскуола оҕолоро Галина Максимовна оҕуруоннан тикпит симэхтэрин кэтэн дефилелаан көрдөрдүлэр.
Семинар түмүгэр республика библиотекардара Галина Максимовнаҕа элбэх боппуруос биэрдилэр уонна бэйэлэрин санааларын эттилэр.