(Латыш остуоруйата)
Икки бырааттыылар олорбуттар: биирдэрэ баай, атына дьадаҥы. Биирдэ дьадаҥы ини өрүс биэрэгэр мас кэрдибит. Ол турдаҕына сүгэтэ илиититтэн төлө тутуллан, ууга түспүт уонна тимирэн хаалбыт. Дьадаҥы, тугу да гыныан булбатах, олоро түһээт ытаан барбыт. Эмискэ, хантан кэлбитэ биллибэт, кыырыктыйбыт баттахтаах кырачаан оҕонньор кэлэн турар эбит.
-Ытаама,-диэбит кини. –Мин эйиэхэ көмөлөһүөм. Туох буолла? – Дьадаҥы бэйэтин иэдээнин туһунан кэпсээбит. Онуоха о5онньор:
-Мин сүгэни ууттан таһаарыам.
Кини ууга илиитин батары биэрбит. Уонна үрүҥ көмүс сүгэни ойутан таһаарбыт.
-Эйиэнэ дуо?
-Суох,- дьадаҥы хардарбыт.
Онуоха оҕонньор ууттан боростуой сүгэни таһаарбыт.
-Дьэ, бу миэнэ!-диэбит дьадаҥы уонна махталы кытта сүгэтин ылбыт.
Дьадаҥы, сүгэтин ылаат, үлэтин салгыан баҕарбыт. Онуоха оҕонньор эппит
-Бэйэҥ сүгэҥ кэргэттэргин эрэ аһатар буоллаҕына, бу сүгэлэр эйиэхэ элбэҕи оҥоруохтара.
Итиэннэ дьадаҥыга кыһыл уонна үрүҥ көмүс сүгэлэри туттартаабыт. Ити күнтэн ыла дьадаҥы олоҕо улам тупсан барбыт. Сыл эрэ ааспыт, кини убайын курдук байбыт. Убайын дьиэтин курдук дьиэ туттубут. Сотору баай убайа кэлбит.
-Дьиктиргиибин,-диэбит кини.-Эн бу хайдах байдыҥ?
Онуоха инитэ туох баарынан кэпсээн биэрбит.
Ону истээт, убайа дьиэтигэр ыстаммыт. Сүгэтин эһэ охсон ылан ойуурга сүүрбүт. Өрүс биэрэгэр кэлэн, маһы биирдэ-иккитэ охсоот, сүгэтин ууга элиппит. Онтон олоро түһэн, тыа баһа сатарыар диэри ытаан энэлийбит. Эмискэ оҕонньор баар буола түспүт.
-Эн тоҕо маннык ытыыгын?-диэбит кини.
Баай бэйэтин иэдээнин кэпсээбит. Оҕонньор илиитин ууга уган үрүҥ көмүс сүгэни хостообут уонна:
-Бу эйиэнэ дуо?
-Миэнэ!… Аҕал, субу миэнэ…!
Оҕонньор киниэхэ үрүҥ көмүс сүгэни биэрбит уонна кыһыл көмүс сүгэни таһаарбыт.
-Эйиэнэ?
-Миэнэ!-ордоотообут баай.
Оҕонньор тимир сүгэни эмиэ булбут. Баай үс сүгэни үһүөннэрин сулбу тардан ылбыт уонна дьиэтигэр ыстаммыт. Оннооҕор баһыыбалаабатах.
Баай киһи баран испит, баран испит. Түүн буолбутугар кини муммутун дьэ өйдөөбүт.
Баай элбэх күн ойуур устун айаннаабыт. Хайдах аччыктыыры, тоҥору, дьэ, манна билбит.
//Кэскил: Оскуола иннинээ5и саастаах оҕолорго хомуурунньук /Хомуйан оҥордулар: А.А. Егорова, М.П. Захарова.-2-с эбэн, тупсаран таһаарыы.-Дьокуускай: Бичик, 2002.-С.16-17